曾經憑一曲《娃娃愛天下》而被江華狠批「過份自信」的黃宏舜（娃娃舜），神隱14年，前晚終於再度現身，與雨僑在荔園合唱《娃娃愛天下》，昨日本報記者再度找來江華評一評他的表現，轉行做保險的江華在電話訪問上說：「我睇咗嗰條片，同十幾年前分別唔係太大，我所指嘅係嗰個演繹，依然係走音、高音又唔到，唯一唔同嘅係肥咗，我唔係要話佢啲乜嘢，如果佢真係要唱歌，其實應該要搵個人學唱歌，基本嘅音準都唔到。」
坊間有不少人覺得娃娃舜的堅持很有意義，江華說：「呢個勇氣係嚟自好多人畀，假設今年如果冇人提呢個人，冇人再去講呢一件事，咁你就消失咗，但係今年有人去提佢，有人去講佢，話好想聽你唱，想見到你呢個表演，呢個咪無形之中畀咗勇氣對方。」
建議跟老師學唱歌
在訪問中，江華提議娃娃舜找老師學唱歌，湊巧他的太太麥潔文是出名的歌唱老師，問會否介紹他去學唱歌？江華笑說：「梗係唔會喇，唔得，太hardsell，呢個唔係我嚟。如果佢自己主動咪OK，我一定唔話：『老婆，佢好難教，唔好收佢。』我只係唔會推薦佢去太太度。」再問他又有否期待兩人世紀相遇？他笑說：「我自己冇乜期待，做乜嘢先，有合適唔抗拒，但係要睇吓啱唔啱。10幾年前喺一個節目做評判，大家覺得成件事好有趣仲擺咗上網，10幾年後因為有咁嘅因緣，所以我都好樂意去回答，其實只係咁啫。既然大家都咁期待，如果我真係開得成電影，考慮搵佢適演一個角色。」
不過江華這部電影目前仍在初步階段，相信他只是𠱁大家開心，至於有否鼓勵說話？他則說：「如果佢（娃娃舜）真係感激大家對佢嗰種關心同鼓勵，應該真係去學唱歌，畀啲專業導師去指導一下，喺呢方面去下啲功夫，有好多嘢係需要人去指導。 」與此同時，娃娃舜事後在facebook留言感謝製作團隊的信任並說：「給我這個等待了多年的舞台，可以認真地專注地去表現自己。每人其實也需要一個機會而已，而不是一個結果。」
而麥潔文亦說：「我有睇過條片，佢同14年前表現差唔多。有時唱歌唔係講改進，天份都好緊要，佢耳仔聽覺唔係好夠靈，音準方面爭啲，所以高音去唔到，聽得唔好，就唔啱拍子，唔啱音，但跳舞就別樹一格，可以考慮喺呢方面鑽研吓。」
採訪：何慧斯、陳杰
