抽水無分老幼，人稱修哥嘅演員胡楓抽濕度極高，噚日同食物及衞生局局長高永文出席一個活動時，兩個人一齊表演棟篤笑，修哥先幽高永文一默，話「佢日日上電視，日日見到佢，佢出鏡時間多過我哋」；俾鉛水事件纏身嘅民望高只能夠苦笑，後來暗地反擊話修哥跳舞叻，應該要示範一吓，修哥就自嘲係俾人鬧到跳舞，民望高好有同感咁講咗句「嗰個係我」。
修哥抽水攻勢源源不絕，力撐民望高：「唔會，你民望咁高，香港人靠晒你㗎喇。」
修哥仲抽埋同場有份出席活動嘅政務司司長林鄭月娥嘅水，醒目補飛話「同埋靠晒司長」，仲叫大家「畀啲掌聲司長」。其實民望高同修哥經常拍檔出席活動，兩個人老友鬼鬼，抽吓水都冇所謂啦。