由內地官二代打骰嘅安邦保險，自2013年12月斥資逾百億元，前後買入招行（3968）27億股（佔總股本10.72%），成為第二大股東，有內地媒體話安邦當年就已經想派條針入董事會，呢一步終於喺噚日實現！
招行公佈，同意增補張峰為非執董，呢位仁兄正係安邦產險現任董事長兼總經理，真係能者多勞，佢仲兼任安邦養老保險董事㖭。
根據招行通告，張峰自2009年10月起，就加入安邦產險，唔同部門都做過吓，理賠部、承保部、車險事業部，就連人力資源部都做過，而且title都離不開總監、總經理、副總經理，算係年輕才俊，唔通因為咁，張峰唔收取董事酬金？
諗深一層，安邦派個年輕有為嘅產險公司董事長落去招行董事會，又點會為咗錢呢？當然，呢項委任都仲要等中銀監核准，不過應該冇乜差池。