官場因為特首梁振英連炒兩人有啲動盪，勞工及福利局局長張建宗就一於懶理呢啲風波，噚日去咗長者安居協會位於何文田愛民邨嘅總部參觀，了解協會平安服務嘅最新發展，仲為即將啟程到台灣參與《不老騎士》長者揸電單車環島活動嘅銀齡製作室成員打氣，祝願老友記台灣之行事事順利。
肥仔張喺中心同義工交流之餘，仲親自打電話慰問使用平安鐘服務嘅長者，唔知長者聽到同佢哋say hello嘅係高官，會唔會更happy？但見肥仔張笑咪咪，可見同老友記幾啱傾。協會近年仲搞咗個賽馬會「生命．歷情」體驗館，透過互動體驗，改變年輕人對年老嘅負面睇法，肥仔張都有親身體驗館內嘅互動設施。