【2O15香港動漫電玩節之最後一擊】動漫節噚日last day，好多人去湊熱鬧，林芊妤（Coffee）、魯芬同喬寶寶就一齊以《龍珠》角色造型現身，吸引近千人圍觀，當中以扮演魔人布歐嘅魯芬最受歡迎。
化身低胸悟空嘅Coffee，即場露兩手，擘一字馬型爆落地，點知褲襠即刻「嘶」一聲爆呔，仲露出紅底，鬼咁香艷，事後佢話：「我有打底，一字馬臨時先知道要做，我做嗰時都感覺到，係我唔記得拉高條褲。」
至於魯芬，以及搽到黑麻麻、扮波波先生嘅喬寶寶都分別用咗幾粒鐘化妝，其中魯芬話：「好開心每年我都有唔同形象，唔經唔覺已經做咗5年，每年都好期待出年可以有乜造型，我未扮過猩猩，大笨象，或者可以扮花木蘭個肥婆，因為把聲我做過配音。」有人讚魯芬布歐造型搶鏡，佢話：「我行埋邊個度都搶，巴渣霸道，我肥咪遮住啲位囉！」
喬寶寶嚇親阿媽
至於喬寶寶就話：「屋企人今朝有睇過，我阿媽見到嚇親，老人家唔知乜叫cosplay。」由於造型難得一見，喬寶寶諗過唔落妝搭港鐵返屋企，佢話：「真係諗過咁返屋企，可能去搭地鐵，大家知係動漫節，地鐵好多人扮鬼扮馬，之前我都扮過阿凡達。」
撰文：馮仁昭
