A股救市搞出大頭佛，中共巨頭每年8月開北戴河會議傾人事，據聞中證監主席肖鋼被炒一事，已塵埃落定。昨日多個網站傳出，將由重慶市市長黃奇帆接任。A股25年來，中證監七任主席都是由銀行調任，皆因阿爺鍾意銀行家較謹慎，但多數冇股壇實戰經驗，搞到一有事，市況就大上大落。如黃奇帆接任，將會打破傳統。
黃奇帆成為大熱係有原因，喺2014年1月，佢曾炮轟A股，指中證監冇搞好監管法規，就一心諗住發新股抽水，搞到股東高位套現，係害股民。一個地方官員竟然公開評擊中證監，極為罕見。
當時已有江湖傳聞話，黃奇帆係自己想坐中證監主席個位。佢之前做上海副市長管金融，喺重慶專門搞國企上市，股壇經驗豐富，難怪內地股民一聽可能由佢嚟救市，都好雀躍。
黃尹華