梁振英連炒兩位局長，民政事務局前局長曾德成話「樂意現在退休」，公務員事務局前局長鄧國威就話有「預計不到的家庭理由」，其實呢啲理由，大家都知道根本唔係理由，不過無論係政界或商界，辭職與被辭職都要搵個理由嘅。
翻查過去一個月嘅上市公司通告，當有董事要辭職，理由來來去去都係嗰幾個，最常見係「需要投入更多精力至其他事務」、「要留更多時間於個人事宜」。雖然港交所早於2007年已經要求上市公司董事辭職時，要講清楚原因，唔能夠下下用「私人理由」就算，但係𠵱家佢哋嘅寫法，同私人理由咪差唔多。
創益太陽能（2468）就夠坦白嘞，公司噚日出通告話執董楊奭強做到9月1日，原因係佢工作超過兩年後，「認為他未能為公司作出進一步貢獻」如此打開天窗說亮話咪好囉，何必費心力搵冇人信嘅原因吖。