星級分析員陸東今年初宣佈因父母離世，無心戀戰，所以摺埋旗下基金，打算休息半年。噚日嘅《耀才財經台》訪問，佢透露，家事要一、兩年處理，暫時冇打算搞新基金，有心搵佢投資嘅人要再等多陣，叫佢講吓興趣就得嘅。
原來佢除咗鍾意龜，對古玩都好有興趣，呢個興趣打從11歲，外公送佢一個由舊租客以物抵租得來嘅方壺開始。佢話，有銀行家前輩教路，玩古玩「一定要精，唔好濫」，所以佢專收藏一般藏家認為唔值錢，甚至只係講價不成用嚟搭單嘅道光藏品。
就連荷里活道古玩店嘅老闆都叫佢唔好嘥錢，不過佢一於自行我素，又話任何投資要成功，必需要有興趣，從中「搵到大錢嘅機會係大大提升」。