立法會暑假唞暑後，泛民最關注嘅人事變動，可能係新一個會期嘅財委會主席，係一如之前安排由吳亮星再次接棒，抑或由陳健波捱義氣頂上？泛民笑言明年係今屆立法會最後一年會期，若星爺接任，隨時搞到一鑊粥，影響建制選情，而泛民呢，自然樂見其成。
根據建制派安排，星爺同張宇人各做兩年財委會主席，張兩年任期已完，明年又輪到星爺揸莊，但相信冇人會忘記佢當年粗暴通過新界東北撥款手法，而佢主持會議手法如何「高明」，就更加令大家記憶猶新。有泛民議員笑言，非常歡迎星爺再披甲，「聽聞佢喺新界東北撥款一役後，雖然好多人鬧佢，但佢完全覺得自己冇問題」，唔排除星爺堅持多做一屆。
陳健波或臨危上陣
之不過建制派都心知肚明，由星爺主持會議隨時一鑊粥，而且若相關撥款喺佢領軍嘅財委會下，無法喺2016年年度通過，咁所有撥款程序就要喺下屆立法會由頭再嚟一次，影響可大可小，而2016年係立法會選舉年，有泛民立法會議員預測，星爺出事機會率逾五成，「泛民梗係樂見其成，當為泛民助選」。
有泛民更笑言，建制派私下都憂心忡忡，擔心星爺遭泛民挑機下，一時殺紅了眼，「又搞一兩單蝦碌嘢，到時真係多得佢唔少」，所以連陳健波都冇否認，好多建制派叫緊佢臨危上陣。
花生友