各位槍迷，三冠王並不是夢！新加盟嘅捷克門將施治好腳頭，踢兩場正選就幫球隊捧走英超亞洲挑戰盃同阿聯酋盃。嚟緊星期日，兵工廠就會喺社區盾鬥車路士，呢粒福星有機會未開「咧」就幫手攞三冠，場均一冠！
力拒倒戈Lord賓來犯
過去周末，阿仙奴按傳統喺主場搞阿聯酋四角賽，佢哋上周六先大炒里昂6:0；到禮拜日對禾夫斯堡，兵工廠幾乎換晒11個正選，包括派咗今夏由車仔來投嘅施治把關。施治首次同主場球迷見面，大受歡迎之餘亦踢出水準，幫阿仙奴保持清白身。對住禾堡唔失波其實唔易㗎，對手有奇雲迪布尼同舒賀爾尼壓陣，創造力十足，當然仲有阿仙奴舊將兼網絡大紅人、外號「Lord賓」的中鋒賓特拿。Lord賓平時霸氣盡現，但今場喺施治面前就毫無建樹，係下半場有次遠射，但俾施治輕鬆沒收。
有施治呢道銅牆鐵壁頂住，阿仙奴班前鋒都放心進攻，終於靠好活躍嘅17歲法國翼鋒艾德萊德50分鐘喺中路推進，之後放直線畀禾確特射入，阿仙奴就靠呢個入波贏1:0。根據賽制，兵工廠兩戰全勝入七球，以13分奪冠；同日以2:0贏咗里昂嘅維拉利爾，就以10分排第二，禾堡得一分排第三，里昂就零分包尾。
下個目標：社區盾
施治加盟後，首場正選係新加坡舉行嘅巴克萊英超亞洲挑戰盃決賽，幫球隊贏咗愛華頓捧盃；到第二場，佢就幫球隊贏禾堡攞埋阿聯酋盃，真係出親場都有盃捧。領隊雲格大讚施治可以穩定防線軍心：「施治係最頂級嘅門將，佢擁有豐富經驗，又擅於組織隊友佈防，為我哋後防帶來一份穩健。」施治下周日將會面臨重大挑戰，代表兵工廠喺社區盾鬥舊會車路士。若果阿仙奴能夠力克車仔，施治就可以完成三戰三冠嘅創舉！
正當施治揚威阿聯酋球場，有人就失落告別，波蘭門將施捷斯尼宣佈自己禮拜一去到羅馬，將會加盟呢支意甲球隊。
