「若果你，未覺荒謬」，究竟曾德成同鄧國威局長點解會被辭職？政壇當然冇人相信佢哋真係因為「樂意現在退休」同埋「預計不到的家庭理由」而退下來，德成局長死因有指係「被卸責」，話佢冇搞好青年工作，都叫做有啲眉目；但另一位局長鄧國威係點死？都幾撲朔迷離。八方開壇為Paul Tang查找死因，八到佢其中一項罪狀，係方丈認為佢整治唔聽話嘅公務員工會成員不力。
指寄政改單張冇違規
呢單嘢據聞同學民仔都有關㗎。事緣舊年8月，學民仔向香港郵政申請通函郵寄服務，想郵寄政改宣傳單張。呢單申請俾香港郵政拒絕咗，當時香港郵政局員工會主席葉錦富曾開腔為學民仔發聲，話覺得學民仔冇違規，認為部門處理手法有欠妥善。
八方聽聞，呢件事傳到方丈耳裏，佢相當震怒，下令要研究有冇得對呢位手指拗出唔拗入嘅公務員採取紀律處分。呢張單落到Paul Tang手上，佢當然冇跟柯打照做啦。嗱，今次唔係Paul Tang份人hea爆唔肯做嘢呀，而係根據規矩，根本冇嘢可做，但方丈份人覺得局長小小事都做唔到，或者成為日後死因之一。
八方問過葉錦富，佢話自己當日以工會身份講番部門一般工作程序，根本冇任何違反紀律嘅問題，而當時兩大左報亦有大肆報道詆毀佢。葉錦富話，如果方丈真係想整治敢言公務員而間接累到局長，佢會覺得遺憾，佢個人都覺得鄧國威落馬相當突然，睇唔出佢任內有乜大錯。
李八方
mailto:[email protected]