內地媒體報道，今年以來，A股已有近400位董事會秘書離職，超過去年總和。原因？佢哋要不停諗停牌、復牌理由，真係好易精神分裂，惟有早走早着。以而家市況，恐怕來緊又有一半A股停牌，佢哋又要傷腦筋再諗停牌理由。
7月初大跌市時，A股超過1,500隻股份停牌，成為全球股市奇景。阿爺竟然允許咁停牌，更奇上加奇。原因係A股指數唔計停牌股份股價表現，越多股份停牌，表面上指數就冇跌得咁傷，阿爺面子上亦好睇。
暴力救市後，股市稍微反彈，又有過千隻A股急急腳復牌。不過，人算不如天算，阿爺救市效力可能連一個月貨仔都冇，A股而家又再冧市。之前啲停牌復牌理由已經夠晒千奇百怪，今次真係要發揮無限想像力，先可以自圓其說去停牌。
黃尹華