澳洲娛樂公司Echo Entertainment、遠東發展（035）聯同鄭家純（純官）嘅周大福企業早前投得澳洲布里斯本賭牌。Echo行政總裁Matt Bekier爆料話，純官準備將旗下周大福（1929）嘅珠寶VIP客，介紹去澳洲豪賭，實行交叉銷售咁話。
外電引述Bekier指，周大福嘅「超級超級VIP」大概有1,500至2,000人，估計佢哋將來去到賭場，每小時可以豪賭超過2,000美金。每介紹一個客人，周大福都會得到介紹費。
做周大福VIP唔難，中港兩地客人，分別一年內消費滿100萬港元或50萬人仔，就可以做到最高級嘅「鑽石級」VIP。公司特設團隊照顧呢班貴客，今年就請咗佢哋去意大利參觀世博，舊年就去咗韓國玩，完全免費唔使錢！