一連5日嘅動漫電玩節今日last day，重點節目係動漫cosplay大賽總決賽，一班參加者噚日仲同各地cosplayer交流。噚日嘅亞太區cosplay嘉年華，日本、泰國、新加坡、台灣、上海等cosplayer都嚟到會場大顯身手，無論係服飾、模仿動漫人物等等都好認真、好細心，真係好似喺動漫走出嚟咁。
至於今日中午嘅cosplay總決賽，10隊入圍隊伍將會有加長版演出，除咗服飾別出心裁，仲會將漫畫選段演繹出嚟，唔係行catwalk咁簡單，隊伍之後會繼續拉票，預計傍晚時分就會舉行頒獎禮。
睇完比賽可以睇埋LEGO建築師大賽理想家居頒獎典禮，冠軍人馬11歲，季軍6歲，最年輕入圍嘅小朋友得4歲。睇完頒獎禮，就係HeartBeat青年音樂祭再encore，表演嘉賓係蒼井翔太。
對於動漫迷嚟講，呢啲比賽其實全部係配菜，嚟到last day指定動作梗係趁大劈價掃貨。今日開館時間依然係朝早10點，但就會提早一個鐘，即係8點收檔。