馬主買一匹馬，身價閒閒哋幾百萬，除此之外，養馬費亦好貴，咁究竟有幾貴呢？最揦脷就係養喺冠軍練馬師大摩馬房，每匹馬每月要四萬九千蚊，最平嘅吳定強亦要三萬三，而拉勻全港24廐，平均數就係四萬蚊一個月。
「精彩小子」馬主兼鄉議局主席劉業強，喺英國、澳洲等地亦有養馬，佢話香港嘅養馬費近乎全包宴，雖然貴但合理。他說：「喺外國練馬師收取練馬費約萬幾蚊港元，但仲有租跑道費、醫療費、乜費物費，馬主要面對十幾個出單部門，唔平之餘亦好煩。」
劉業強又話雖然馬主支出大，但香港馬會亦花錢做咗好多嘢，保障馬主。「家陣嘅跑道保養大大改善，軟硬適中，馬匹傷腳比率，比80年代大大減低！」
咁全港馬主中，邊啲人支付最多養馬費呢？原來係從事地產等生意嘅蕭百君家族，佢哋一家有15匹現役馬，唔少更養喺昂貴嘅摩廐，一年養馬費開支至少720萬，而上季呢批馬為蕭家進貢大概約760萬獎金收入，大致打個和，但想賺番購入15匹馬嘅天文數字身價，咁就唔容易咯！