邊個係港男icon？竟然係高登仔?!有品牌委託浸大就港男嘅男人味進行調查，訪問1,003名18至35歲本地年輕人，男女各半，若以10分為滿分，港男嘅男人味得6.13分，僅僅合格咋。但係如果要受訪者喺亞太區選邊度男士最有男人味，仍然最多人揀港男，台灣同韓國緊隨其後，其餘依次係日本、新加坡、中國、泰國、印度同馬來西亞。
但最令八方意外嘅係，問到最經典港男形象，最多人選嘅係高登仔（34.5%），第二及三位則係MK仔（20.8%）同阿源（9.4%），連委託做調查嘅打火機品牌Zippo都喺新聞稿話「明顯與典型男人味形象有些距離」。最具男人味男明星結果就較少爭議，53歲劉德華（17.4%）力壓周潤發（12.4%）同吳彥祖（8.0%）。