阿里巴巴管理層今年初有人事變動，原本只係負責旗下淘寶嘅張建鋒，極速上位接管淘寶、天貓及聚划算三大網購平台，隨即被市場認定為阿里老闆馬雲身邊嘅大紅人之一，而佢亦係阿里其中一名合夥人。
新近西甲足球班霸皇家馬德里進駐天貓開官方用品專賣店，球隊主席佩雷斯噚日人在廣州，就跟張建鋒交換球衣。
據講，張建鋒話自己嘅幸運號碼係8號，於是對方就安排一件8號球衣畀佢，跟皇馬中場卻奧斯上季嘅號碼一樣。
至於佩雷斯收到嗰件T-Shirt，大家仲記唔記得阿里舊年去美國上市時，整咗個「景泰藍淘公仔」畀紐約交易所呢？T-Shirt上面就係印咗呢個公仔嘞，仲有埋佩雷斯個名㖭。
咪睇小呢件T-Shirt呀，阿里上市時，搵8名商戶去敲鐘，佢哋當時都係着住呢件衫㗎，果真物輕情意重。