本港練馬師告達理兒子告卓華（Martin），正喺新西蘭自己嘅Winmark馬房，教導女友Paris陳穎學習馬房工作。Paris日日深夜三時半就起身做嘢，跟手睇啲馬匹摸黑操練，不過佢冇嗌晒救命，反而樂此不疲，顯得好enjoy。
喺香港馬匹通常怕熱開行冷氣，但新西蘭就相反，馬房內有盞大燈，搞乜鬼呢？Paris解釋嗰盞係暖燈，因為七、八月當地天氣凍，要畀啲溫暖馬匹。
Paris除咗要執馬屎外，又要幫馬匹洗白白豬，沖個暖水浴，沖完又要幫馬身刮水，唔知Martin想唔想好似啲馬仔咁，有靚女Paris細心服侍呢？
唔好以為沖完涼刮完水，Paris就可以收工，佢話仲要做埋掃地阿嬸，清潔乾淨啲地方。
當然啦，Paris唔係純粹去做苦工，都有輕鬆嘅時候，佢會抽空去行吓街，Shopping買吓嘢，又同Martin漫步沙灘，仲大晒三點式，喺新西蘭浸溫泉，咁充實嘅生活，真係恨死唔少港女。
攝影：Taca Ho