隨住特首梁振英連換兩局長博翻身，2017年特首選舉戰似乎已經入直路，但咪以為CY去到咁盡就等於有機，自從獲國家主席習近平金手一握後，財爺鬍鬚曾下屆特首跑馬仔行情亦被看漲。八方四出打探過，據聞財爺呢一刻仲未諗係咪去馬，但政壇咁凶險，唔理佢有冇咁嘅諗法，四周已經暗箭齊飛，但相信佢有習一握護身，暫時都可以力保不失。
越早見光 越易墮馬
話說上星期，政界突然有人放風，話鬍鬚曾近日頻頻約商界選委飯敍，地點多數係外面餐廳而非官邸，仲要似乎唔關公務事，而係想私底下廣交好友咁話，繼而就有兩份同CY關係唔錯嘅報紙收到呢條料，之後仲去問財爺嘅發言人回應。
八方聽聞，發言人矢口否認有呢啲飯局，但見報之時，一份報紙完全冇報道呢個回應，另一份就只引述「財爺方面」話佢平常都會同政黨、商會定期聯絡，冇特定跟選委食飯。
吖，點解要放風話鬍鬚曾動作多多，要營造到財爺呢刻已經有心落場打仗咁款呢？有政界中人分析，越早見光想去選、墮馬機會越高，唐英年就係最佳例子啦。
八方反而最想知，點解政圈真係一如曾鈺成所言，只要你俾人話係特首之選，就突然會有黑材料等暗箭放出。今次到底係邊啲人向財爺放箭呀？八方唔敢亂估，只記得最近有傳CY同梁粉都唔like財爺，莫非……
李八方
mailto:[email protected]