最近有一位港大物理系畢業生，33歲，擁有港大、中大、科大三個碩士學位，因長期找不到穩定教職，成為中學合約教師人球，在不同中學轉來轉去，終告失業，不知是否因此患上情緒病還是其他個人原因，用膠袋笠頭，自殺了事，最感痛苦的，自然是年老雙親。
教協因此事，到政府總部抗議，當然得不到結果，不了了之。左丁山是一間本地中文中學校董，所謂校董也者，只是好聽啲嘅名詞，官方名稱係School Manager，校董會其實係School Management Committee，以前古老中文叫校董，現時新派翻譯就係學校經理人，幾惡頂。成班「經理人」為自己面上貼金，依舊習慣，稱呼自己為校董，不致商業化有失斯文喎！
做本地津貼中文中學校董，若非有歷史有名氣名校，都幾神仙難變。香港的家長最憎中文中學，學生最怕入中文中學，中中收生有先天困難，學生及家長全部來自基層（有辦法兼有錢仔女全部入英中或國際學校），於是想學喇沙女拔搞賣物會搵家長捐錢呀？免問，搵外人捐錢買電腦呀？免問，九成九經費來自教育局撥款，即係啱啱夠，多一兩萬蚊都唔駛慌。教育局撥款有一秘密絕招，就係校產不用折舊（depreciate），十年前買入嘅乒乓波、羽毛球、波枱等等仍然係照原價記帳，於是睇就好睇，學校資產甚多，唔駛補充，其實全部已破爛不堪。肥仔K讀中學時就曾經此苦，學校有幾百個乒乓波，但真係可以用來比賽練習嘅，少之又少，學生唯有夾錢買波，佢做學生時好唔明白點解㗎。除費用實報實銷之外，中中每年收生困難，碰上學生人數減少，就會有縮班壓力，於是教育局同學校計數：喂，超額0.9、0.8甚至0.1個老師噃，教育局會依比例減教師減少撥款。唉，超額0.5個老師，即係點？校長淒涼咯，要搵一個老師開刀，叫佢減薪一半，通常梗係新入職老師啦，或者一到學期完畢，就叫新入職合約教師鬆人。好似最近有一廣告，學校聘請0.1個教師，真係笑中有淚。近年不斷縮班縮教師數目，中中教師唔神經緊張就假，教中英數通識，因必定有學生，飯碗還算穩陣啲，教中史、理、化、生等，就要睇有冇學生選修，教職冇保證，幾陰功㗎。