咪睇消防員同救護員大大隻以為好粗魯，查實呢班硬漢子，都有柔情細心嘅一面。好似消防處義工隊咁吖，每個月原來都會免費為長者修剪煩惱絲，駐守東涌救護站嘅救護總隊目麥業華5年前加入義工隊，係首批學剪髮嘅義工，佢話最初攞住鉸剪真係好緊張，諗過剪親自己手指，𠵱家一個月為長者剪兩次髮，有滿足感又可減壓。
除咗為長者剪髮，義工隊都會去護老院探長者，有時會先上酒樓買點心畀長者嘆一盅兩件。駐守油塘消防局嘅消防員馮文健仲會將點心剪碎，方便長者咀嚼，佢笑住話做嘢時要行動迅速，面對長者則要溫柔細心。其實消防處義工隊喺2002年成立，𠵱家有逾千成員，除咗剪髮、探訪等，仲會幫有需要人士搬屋㗎。截至去年，義工隊累計服務逾13萬小時咯。