【本報訊】5月中暴炒股股災，有「高銀孖寶」之稱的高銀地產（283）及高銀金融（530）市值從高位至今縮水2,680億元。高銀系主席兼大股東潘蘇通身家雖然不見逾1,800億元，但豪氣不減：「股價值幾多錢係紙上富貴，我最大唔同，係我唔會在乎股票價值係幾多。你日日睇股票，你會發傻㗎，會癲鬼咗。」
記者：馮健鏗天津報道
潘蘇通日前於天津接受本港傳媒訪問，這位視股價如浮雲的低調富豪，卻不准傳媒拍照及錄音，只可筆錄。對於高銀孖寶股價大插水，他講明自己無份賣，「大股東一賣，股價就冧咗落去。最着數係呢班咁嘅兄弟（指向員工），股價越高嘅，option多咪即刻賣囉」。高銀地產一直被證監指股權高度集中，6月初13名股東共持有30.75%公司股份，他回應「嗰啲係證監講唔係我講，我乜都唔知。」
若折讓大 會增持股份
「（證監會）冇搵過我，搵我做乜鬼，股價高高低低同我有乜關係」，當被問及會否再增持，他不置可否，稱一旦股票價值同實際價值有吸引折讓，便一定買，「隨便搵個測量師行去估（值）下，一定唔係今日所反映出嚟嘅股價。」高銀金融及高銀地產從今年高位分別累跌82%及74%，市值分別為439億及256億元。
高銀地產3月曾發通告，指大股東有意私有化，但至今仍未有任何要約提出，潘蘇通稱「想到唔想，恨到唔恨」私有化公司，「好多手續㗎，第一要有錢，第二股東要肯賣畀你。」
高銀地產被質疑只有「新京津．高銀天下」單一項目，潘蘇通反駁指該項目非常龐大，投資額達100億美元（780億港元），總計劃樓面面積約189萬平方米，更內建一幢樓高117層的甲級辦公大樓，規模冠絕中國房地產開發商，不斷強調項目能拉近北京與天津的距離，成為天津新的市中心，「好多人成問我幾時賣樓，喂，我覺得需要賣我就賣，我唔覺得需要賣我就唔賣！」
賣樓拒追求貨如輪轉
雖然預計整個項目明年竣工，但潘蘇通豪言不會追求貨如輪轉，主因無人向他追數，「我係千金買宅，萬金買鄰，我自己會揀我鍾意、適合嘅人我先賣畀佢。」「做生意我好貪，但我唔急，我做呢個刁（「高銀天下」項目），如果人哋去做，可能賺20%至40%已經好開心，我起碼要幾倍我先肯做」，他亦多次強調自己不是傳統的地產商，不用依賴銀行貸款渡日，「最巴閉一樣嘢，我哋唔係一開始就借銀行錢。但好多地產商都冇辦法，買地要同銀行去度水去起樓，即係買完地就快啲起，起完就快啲賣，然後先有錢還錢畀銀行。」