港台王牌節目《城市論壇》做埋噚日就唞暑，9月6日再開壇，但屆時嘅主持未必係謝志峰，因為佢10月31日就因為已屆退休年齡而被退休，相信港台未必搵佢做新一季話事人。2003年至今一直做壇主嘅佢，噚日最後開壇獲得唔少左中右粉絲集郵，紛紛話好唔捨得。因為頻現身《城壇》而知名度增嘅民建聯副主席周浩鼎，為咗謝志峰嘅最後一次，前晚專程深夜搭飛機由北京返港，噚日現身台下打氣，佢大讚對方做主持幾公道。
但有班建制派人士唔係咁諗，節目開始前手持「主持立場偏頗 謝狗一路歸西」等標語衝上台，有人仲講埋粗口，謝志峰為咗節目準時播出，惟有話：「好啦，等天收我啦，落返去先，危險！」咁啱得咁蹺，噚日《城壇》節目主題竟然係兩名局長被退休，謝志峰對此笑稱自己只係小人物一個，點同兩局長相比呢？