股神畢菲特投資金句：「第一戒律是不要蝕錢； 第二戒律就是別忘記第一戒律。」小學生都識背嘅投資戒律，原來實戰時係講容易過做。
最近一份港人理財態度調查發現，假如投資損手，受訪者話蝕四個幾月人工都甘心。其實反映投資者實戰期間只記得做止賺，卻忘了止蝕，到最後都係得白做。
中港股市啱啱先喺大跌市回過神，但上星期輪到大宗商品市場接力冧價，金價外，銅、銀、鉑金、小麥、咖啡同糖價，幾乎全部跌至2013年低位。今次商品冧價，有人歸咎於美國年內加息憧憬重燃，美元強勢令商品價格遭殃，市場亦解讀為中國經濟下行預兆。
世銀最新發佈《大宗商品市場展望》預測大宗商品價格今年持續弱勢，貴金屬價格平均下跌17%，較4月預測跌12%睇得更淡。
當中鐵礦石價格最難翻身，主因澳洲同巴西新增產能，料鐵礦石價格將由3年前高位每噸190美元跌46%。此外，鋅價亦被睇淡，料今年或瀉30%。
今次商品冧價敲響全球經濟危機警號，如重型機械重工生產商Caterpillar行政總裁說：「環球經濟仍然停滯不前，好多主要工業仍然積弱，幾乎睇唔到改善訊號。」
C+B
本欄逢周一刊出