噚日八方行過旺角麥花臣球場，原來係一年一度阿姆斯特丹2015無家者世界盃慈善籌款賽，梗係入去睇波啦！社民連長毛梁國雄、工聯會郭偉強同民建聯梁志祥3位立法會議員落場同香港集訓隊成員同隊，對無綫電視「兄弟幫」踢咗場表演賽，連平日西裝骨骨嘅港交所行政總裁李小加，居然都一身短褲波牛look齊齊踢波，仲唔止作狀搓幾腳，真係睇準時機起腳勁射，入到一球㗎！
長毛狀態麻麻冇進賬
毛哥係足球躉係人都知，佢曾經自費隨同香港無家者代表隊遠征，但噚日可能狀態麻麻，雖然已經努力走位，可惜無功而還，反而郭偉強同梁志祥都有多次起腳機會，郭偉強有一球進賬。雖然踢得好落力，但最終都係同舊年一樣輸畀兄弟幫，完場比數4：8，財爺鬍鬚曾負責頒獎。而噚日24隊慈善賽參賽隊伍，為香港區籌委會籌到約28萬善款，支持港隊訓練同參賽經費，並展示對弱勢社群嘅關懷。