當泛民主派喺立法會財委會都唔多敢玩拉布戰，以免民生議程受阻，大家都可以見到，年底區議會選舉嘅「阻嚇力」有幾大，但相信各個黨派都估唔到，政改以極出乎意料方式被否決後，建制派啱啱從創傷中復元過嚟，穩定番支持者嘅軍心之際，竟然嚟個全港屋邨鉛水大風波，而今次建制派竟然蝕章，畀民主黨跑贏幾條街，難怪各出奇謀急起直追。
其實花生友同啲政界中人傾過，佢哋都話呢期民主黨似乎行緊大運。先有如無意外會喺年底區選初登大場嘅林卓廷，以反圍標先鋒嘅形象大殺四方，就翠湖圍標案一擊即中打出名堂後，估唔到平時一嚿雲嘅黃碧雲，又盲樁樁攞鉛水去驗而揭出一個政府監管不力大醜聞，成為該黨另一個冤情大使，為個黨攞到唔少分。
正因為對手來勢洶洶，驗鉛驗到「鉛鉛不絕」，點會唔令到競選對手好緊張？所以過去一段時間嘅地區眾生相都咪話唔好睇，睇見九龍西女將個個以其他方法幫啟晴邨居民，就知一嚿雲嚇到佢哋暈得一陣陣。點知好戲係在後頭，葵聯邨嘅鉛水風波，民建聯加入混戰，抱B叫囂兼攔車，令呢場風波絕冇冷場。
花生友聽聞建制派確實好緊張，認為輸咗頭威，梗係要贏番尾陣，尤其呢啲涉及基層市民健康。基層市民喎，明明係佢哋嘅票倉，點可以畀啲票隨住鉛水流入泛民田？所以有理冇理大舉出擊，就算俾人笑係食水尾，總之市民知佢哋都有做嘢就得，不能讓民主派專美。
花生友