上個月卸任浸會大學校長嘅陳新滋（圖），原來已經獲聘為廣州中山大學教授兼學位委員會主任，今個月正式喺中山大學藥學院工作。
中山大學話呀，陳新滋嘅加盟，對大學藥學院建設一流學科、拓展研究範圍、加速科研成果轉化、促進粵港兩地合作可以起到積極推動作用，同時亦對中山大學建立人才起到引領同示範作用。
陳新滋1975年喺日本東京國際基督教大學畢業，1979年攞到美國芝加哥大學化學系博士學位，2010年獲選為中國科學院院士，並先後喺美國孟山都公司、台灣大學、香港科大、理大同浸大任職。而佢喺浸大期間最惹火嘅事，莫過於同政府爭取前李惠利用地建中醫院不果，八方聽聞佢做浸大校長時幫手籌到唔少錢，唔知會唔會幫中山大學搵到幾支大水喉射住吓？