曼城季初大件事！除咗阿古路同薩巴列達呢班南美兵應該踢唔到第一周聯賽，仲有機會連下月中對車路士場英超大戰都缺陣；更大劑嘅係，耶耶托尼同戴爾夫雙雙喺熱身賽受傷，已經飛返去英國養傷，唔知趕唔趕得切英超開季。
耶耶戴爾夫提早返歸
曼城上周五喺國冠盃澳洲站俾皇家馬德里大炒4:1，真係好傷！新加盟中場戴爾夫第一次幫「藍月亮」上陣，結果踢咗唔夠廿分鐘就觸傷腿筋，坐住擔架離場。賽後領隊比歷連尼都愁到爆咁話：「戴爾夫喺左路好重要，佢受傷真係一個壞消息。佢啱啱先嚟到我哋度㗎咋！」禍不單行嘅係，原來另一名中場耶耶托尼都傷埋，佢喺場波硬接皇馬門將基羅拿華斯一招，雖然當時冇乜大礙，點知原來都有撞傷。耶耶同埋戴爾夫已經離開大隊，搭飛機返英國休養。而曼城大軍就繼續遠東之旅，離開墨爾本飛去越南，佢哋禮拜一會喺河內友賽越南國家隊。
開季鬥西布朗車仔惡踢
比歷連尼嚟緊季初都幾頭痕，除咗唔知耶耶同戴爾夫傷成點，阿古路、薩巴列達、迪米捷利斯同費蘭甸奴呢四位南美國腳都仲放緊假，應該踢唔到對西布朗嘅聯賽開「咧」戰。比帥話：「球員一年要踢好多比賽，當踢完國際賽後，我會畀一個月時間佢哋休息，咁樣佢哋先可以喺新球季搏命。當曼城完成呢次外訪之旅、返到曼徹斯特後，我諗呢班球員先至啱啱歸隊。佢哋好有可能錯過第一場聯賽，但我肯定佢哋會全力操練，希望盡快幫球隊上陣。」
曼城第一場聯賽會喺8月10號作客西布朗，如果冇咗呢班主力，其實都幾難踢。第二場，曼城就會喺16號迎戰車路士，若果到時阿古路同薩巴列達等都仲未操「弗」，曼城就真係凶多吉少嘞。雖然正值用人之際，但迪斯高同祖維迪呢兩位前鋒依然好大機會離隊，喺近呢兩場國冠盃，佢兩位都冇正選，比帥亦話：「我唔知迪斯高會唔會決定留隊，但佢仍然會跟大隊操練。」