兩位問責局長突然辭職，頗令人愕然。公務員事務局局長鄧國威素來極低調，該局亦係實務機關，管公務員薪酬調整、人員升遷、調動、招聘、退休等等，與政治無關，除非發生特大醜聞箒，否則冇議員、冇傳媒會向公務員事務局畀壓力，相對其他日日面對政治化，民間批判嘅問責局嚟講，任何退休AO坐上鄧國威呢個職位，都會安享高薪、無驚無險就做完五年任期啦，點解鄧國威要提早鬆人呢？佢話係因為「預計不到的家庭理由」，需要更多時間陪伴家人，通常呢個理由往往係「本人或親人」嘅健康出現問題嘅徵兆，咁就令人惋惜啦，希望只是一句善意的謊言！接任人係張雲正，現任海關關長屬D6級。做官要講官運，張局長以前在曾特時期，被派往為郵政署做署長，此職係「閒職」，好多時係退休前最高職位，點知佢突然會一個鯉魚翻身，調任權責更高嘅海關關長，現在更由D6躍升三級為問責局局長，五年前佢都會發夢唔到，如命該如此，旁人無謂眼紅！
至於根正苗紅嘅曾德成，1998年加入中央政策組，受曾特委任為民政事務局局長，梁特請佢連任，掌管民政文化已有八年之久，照計地位穩如泰山，無人可以挑戰佢，2017年選舉後，假如佢要繼續做，北京肯定會支持，呢個職位關乎民政、民間事務、文化統戰，斷不能用一位「自由派」及港英遺官去做嘅，故此曾德成一聲「樂意退休」（連佢阿哥曾鈺成亦覺詫異）啫，梁特立即搵民建聯強硬派劉江華接替，梁粉網頁跟住轉述消息人士，唱衰曾德成，咁就揭露出真相其實係梁特清除「異己」或「瘀血」，唔怪得佢宣佈時笑得好開心。劉江華出身模糊，初出道時，係港同盟（民主黨前身）人馬，其後逐漸露出真身，乃係民建聯外圍，專門專心在沙田公屋區展開工作，有龐大吸選票力量，2012年競選議員意外落敗，就被「組織」保送成為政制及內地事務局副局長，睇住拍住譚志源局長去搞政改，現政改失敗，其任務完成，本可投閒置散，點知曾德成突然「退休」，於是劉江華可以「冷手執個熱煎堆」，更上一層樓。點解推動政改失敗都可以升官咁筍嘅？睇嚟事必有因，畢竟曾德成年紀漸大，副手許曉暉還是年輕，而且呢位中大小師妹未必夠辣，由一向願意做爛頭蟀嘅劉江華接任，正合梁特路線，如不出差錯，梁特在2017年連任，劉江華可繼續印印腳領高薪，古語有云：識時務者為俊傑，劉江華從政多年，不紅不黑，勝在識看風駛