牙買加飛人保特今年好似狀態麻麻，加上傷患纏身，令唔少粉絲都擔心佢喺八月嘅世錦賽，跑唔跑得贏基寧同鮑維等強敵。不過，保特喺上周五嘅周年紀念運動會暨鑽石田徑聯賽倫敦站嘅賽事，就喺男子100米跑出個人今屆最佳嘅9米87成績奪標，佢賽後仲話好成績陸續有嚟！
今次倫敦站除咗保特外，之前受刻意唔去藥檢傳聞困擾嘅法拉，亦都有參賽，仲喺男子3,000米跑度掄元。至於英國七項鐵人靚女恩妮絲，就喺女子100米欄得第五。咁名氣唔夠嘅又點呢？咪靠造型突圍囉，好似意大利跳高選手譚柏利，佢就以半邊面留鬚造型嚟搶鏡。23歲嘅佢自2011年起已經以咁嘅造型參賽，佢話係要嚟娛樂觀眾喎，而喺上周五，佢就喺男子跳高以2米28得銀牌，成績都唔差。