人人難免都飾演過情人甲吧──就連國際級女神都唔例外。28歲嘅俄羅斯靚女網球手舒拉寶娃，周四被爆已經同後生四年嘅保加利亞籍球手狄美托夫分手，原因係狄美搭上個曾係《花花公子》年度玩伴嘅小三。
ESPN知名記者Darren Rovell喺twitter爆料，話有消息人士已經確認，呢對網球壇「金童玉女」真係分咗手。而保加利亞八卦網媒就進一步披露內幕，話狄美喺上個月溫網期間，搭上咗27歲性感模特兒妮高莉達（Nikoleta Lozanova）。
男方新歡係足球人妻
妮高莉達九年前當選保加利亞版《花花公子》「Playmate of the Year」，身材比舒娃有過之而無不及；不過，查實佢係有夫之婦，同𠵱家踢緊柏迪遜嘅保加利亞國腳前鋒保積洛夫仲有個囡囡㖭。
正所謂冰封三尺，非一日之寒，無論場上成就定係場外知名度，狄美都遠遠唔及舒娃，仲俾部份花生友戲稱為「舒拉寶夫」；一直以嚟要維持呢段關係，其實大家都承受唔少心理壓力。雖然早幾個月有傳佢哋已經秘密訂婚，但可惜狄美最終都係選擇出軌。
照post靚相寄情工作
好多人都戥舒娃唔抵，亦有部份男粉絲「FF」女神回復單身後，自己有機會得米……大家諗多咗嘞。雖然男友有外遇，但舒娃之前喺溫網都打得好好，四強先輸畀無懈可擊嘅一姐莎蓮娜；呢幾日佢亦喺社交網站頻頻發佈靚相，分享自己拍宣傳廣告嘅花絮，完全冇展露過任何負面情緒。喺分手消息傳出後，舒娃當然冇正面回應，但就發咗個新post，話自己進行緊一個「秘密計劃」，似係想同大家講唔使擔心，佢寧願寄情工作，做個女強人仲實際。
三年前俾舒娃「撬牆腳」搶走狄美嘅細威，𠵱家同新男友兼教練莫拉托魯過得不知幾溫馨幸福；相反舒娃條情場冤枉路，睇嚟仲未行到盡頭，希望佢都可以快啲遇到最後嗰個「他」啦。
