「現在，有請我們的第一位，蒙面歌王！」
音樂掌聲心跳聲音樂心跳聲掌聲……咁上下啦。歌手出場。
歌手心聲：「唔係啩！佢有份做評判？我識咗佢廿年！一陣肯定認得我，一唱就被人識穿，咁點算？」
音樂起。
歌手歌聲：「攔路雨偏以雪花，飲泣的你凍嗎……」
女評判：「嘩！廣東話！好標準！」
歌手心聲：「我香港人梗係標準啦！」
歌手歌聲：「為何為好事淚流，誰人憑愛意要富士山私有……」
男評判：「聲音很像那個人，但肯定不是那個人！」
歌手心聲：「典解呢？」
男評判：「呢個後生好多，肯定係小鮮肉，比那個人後生。」
歌手心聲：「頂你啊！你成頭白髮你仲老啊！」
女評判：「到底是誰啊？猜不出！」
歌手心聲：「唔係咁大鑊啩！我喺香港紅足20年，我個隻《紅色的日頭》喺大陸都唱到街知巷聞，唔係認唔到我把聲啊？」
男評判：「難道是古大基？又不像啊！」
歌手歌聲：「我把這陳年風褸，送贈你解咒。」
歌手心聲：「唔係哇？我把聲似古大基？咪仲慘過認錯許志安做杜德偉？」
女評判：「頭痛啊！是誰啊？」
歌手歌聲：「誰都只得那雙手，靠擁抱亦難任你擁有……」
歌手心聲：「唔通我把聲變咗？唔好嚇我喎！如果唱到尾無人認出咪好瘀？咪啦，出絕招，甩咗個面具。」
面具拋開，變露面歌王。全場驚呼尖叫。
歌手笑容滿面：「大家好，無錯是我。我是……」
男評判：「實在太難猜啦！我真的猜不到他是誰？」
觀眾合十祈禱：「太好聽的聲音，他到底是誰啊？」
歌手急了：「喂！我除咗面具啦！我咪係……」
男評判：「他到底是誰啊！天啊我快要瘋啦！」
公安表示，「猜猜我是誰」的騙案又再出現，呼籲大家小心。