【壹週刊】拍住師傅陳嘉上拍《野獸刑警》，林超賢99年已經拎咗金像獎最佳導演獎，不過始終係聯導戲，對於得到肯定，佢始終有質疑。
當時佢一心沉醉於「動作」，「我好想展現對動作場面嘅調度能力，對鏡頭嘅駕馭能力，簡單啲講，我想展現出一份霸氣」。呢個係一個階段，去到下一階段，當每人都知佢拍槍戰場面耍家，林超賢又會諗「我可唔可以有第二支歌仔唱？」
之後佢離開陳嘉上，獨自探索可能性，先後拍咗吳彥祖孭飛嘅槍戰片《重裝警察》，與及張家輝做主角嘅喜劇《走投有路》，票房一次比一次仆直，「學咗好多，試驗咗好多，亦要面對試驗失敗的後果」。
「最有你所講嘅的低潮，係拍《重案痴孖Gun》，當時原本戲名叫《衝鋒陷陣》，想拍好硬朗、澎澎聲嘅嘢，臨開鏡前兩星期，老闆突然話呢期興笑片，叫我去拍吓。 當時得兩個選擇：拍或唔拍。」所有工作已經起動，仲邊有可能輕言放棄？「結果，唔知自己做緊乜，最錯嘅人係我，我妥協咗，接受咗。」林超賢說。
師徒分道揚鑣多年，陳嘉上嘅作品亦同樣慘淡收場，為求翻身，二人再次拍住上，拍下鄭中基主演嘅《至尊無賴》。呢對金像獎組合，結果獲金話梅爛片獎，「去留就係呢刻，《破風》有一部份都係講呢樣嘢」。
最後，林超賢堅持留喺香港，拍佢最擅長嘅槍戰片，今次，佢死唔肯妥協，結果《證人》與《線人》獲得高票房，兼橫掃各大獎項。林超賢說：「希望係好微弱嘅，咁你要唔要？要你就要去爭取。」