【壹週刊】導演林超賢話明白現今香港人面對嘅壓力，所以先會拍《激戰》，講中年人都可以有一剎那衝破框架，搵到出路。今年嘅新作《破風》，原來係《激戰》嘅年輕版。
「對我而言，踩單車最艱苦係上山，人生就係上山，怎樣可以上山？就係望好你嘅腳下，就可以去到終點。」當初冇人信可以拍到《激戰》呢類拳擊片，結果爆肌張家輝拎咗影帝，冇《激戰》，就冇單車片《破風》。
不過《破風》終於難敵大趨勢，主要喺台灣取景，由台灣彭于晏、韓國崔始源與及大陸竇驍主演，香港演員？沒有。「最難面對係搵演員，《激戰》冇張家輝、彭于晏咁大付出，點做？如果唔係佢哋花幾個月時間付出，你點感動觀眾？」
「單車其實比拳擊更大鑊，唔係彭于晏呢種毅力演員，可以搵邊個做？我將演員當運動員咁操，香港我可以搵邊個做？喺香港，大家一年拍十幾部電影，有邊個肯俾幾個月時間我？雙倍人工我又俾唔起，即使我俾，你又係咪有能力每日踩8小時單車？」林超賢說。
由香港演員講到香港人，林超賢話，我哋嘅態度的確好有問題。「講就好熱血，到真係捱落去，好脆弱，兩嘢就散。最大問題係，散完，會將問題推去俾其他人，自己唔會反省。以前成日話香港人係最捱得，但依家呢個美譽會有少少落差。」
狠批港人，咁港人係咪少少價值都冇？「嗰種急轉彎、執生，嗰種轉數，係香港人仍有嘅，我哋要將佢延展開去。」林超賢話，態度決定一切，或者學張家輝咁講：「唔好怯，怯，你就輸一世」。