民建聯主席李慧琼首次帶隊上京，琼子表現保持淡定穩陣，而佢一身白色套裝亮相，喺成班男黨友嘅深色西裝配藍呔中好突出，其他訪京團女黨員就着咗淡紅色，避免同女當家撞色。唔少政界中人最關注領導人對民記有乜評價，人大委員長張德江大讚民記有老中青三代、亦有專業人士，社會形象好，換言之達到國家前副主席曾慶紅指示嘅「內強素質、外樹形象」要求啦！
有花生友反而留意到張德江噚日狀態似乎唔多好，佢話聽到在場好多舊朋友包括盧文端、譚耀宗同曾鈺成時，將盧文端叫做盧文「瑞」，引述國家主席習近平嘅「四個全面」戰略佈局時又有啲甩咳，唔知因乜事心不在焉。