仗義每多屠狗輩，粗口未必是粗鄙，亦無分貴賤，貧富都可以用來宣洩。杜汶澤、鄭中基憑電影《低俗喜劇》為低俗重新定義，今次再接再厲將香港國際電影節的放映電影《What We Do in the Shadows》重新包裝成《低俗殭屍玩出征》，配上地道市井粗口，將藝術跟低俗crossover，猶如牛丸撈瀨尿蝦，九唔搭八，但玩出味道。
撰文：何永寧
杜汶澤、鄭中基早前為有份配音的電影《低俗殭屍玩出征》宣傳接受訪問，由於內容涉及大量「X」符號，請有識之士自行補白。
談到粗口，阿澤認為不一定是壞事，很多時吃到好食的食物、見到漂亮的事物，往往都會衝口而出加上「助語詞」，他說：「講最多咪『好X好食喎，間屋好X靚呀』，都係無傷大雅。人生第一句粗口係同老竇講，嗰時佢成日打媽咪，有次媽咪已經匿咗入房，老竇仲係咁撞度門，我衝入廚房攞咗把刀喝住同佢講『咪X埋嚟呀』，嗰時大概中一中二咁上下。嗰一刻佢真係面青。」從此，阿澤發現原來講粗口可以增加氣勢及「說服力」。
阿澤的第一次緣於制止家暴，反而中基的第一句粗口充滿喜感，中基以電影《低俗喜劇》中暴龍哥的語氣說：「人生第一句粗口喺幼稚園時候講嘅，講乜嘢，我唔記得嘞，我屋企人話我知嘅。就是突然夾菜食，一放入口，然後就話『點解咁X鹹嘅』，然後我阿媽打咗個突，之後就打咗嗰電話畀校長，問佢『點解我個仔講粗口？』就發現我旁邊嘅同學仔位爸爸好爛口，同學仔學咗就喺學校到處講。」
場地提供：The Tonno
鄭中基服裝：beams from i.t
化妝：Mon Chun
髮型：Horace Tse of Queens private I Salon
杜汶澤化妝：Nicole Chau
髮型：Marco of Hair Corner