明年舉行嘅立法會選舉，邊一區選情最好睇？新界東可能都係熱選，事關9個議席無增加下，泛民政黨都唔夠分要爭崩頭，而向來吸票力不俗嘅橡筋褲鄭家富，原來都考慮緊喺新東復出，若然阿富加入戰團，相信上屆獲佢支持過票並以尾席當選嘅新民主同盟范國威形勢最危，近年以本土議題殺出血路嘅咖喱飯，或者都要用喼神形象力保不失。
太太病情穩定 撐返議會
八方噚日問過鄭家富，佢話考慮復出嘅想法喺佔領運動結束後浮現，觸動點係佔領期間，見到香港老中青都對未來有希望，人人都喺唔同崗位付出，覺得自己喺爭取民主、改善民生上仲有心有力。但佢話仲要同太太商量，指2012年唔冧莊好大原因係想多啲時間陪有腦瘤嘅太太，太太病情近年已穩定，「好支持我爭取民主同喺議會工作」。
外界相信如果佢東山再起，咖喱飯最受影響，阿富話對方當年參選，雖則唔少樁腳都係來自佢嘅班底，但已經同對方提過復出嘅意願，覺得大家有心有力一齊做都好。
到底係咪歡迎阿富一齊落場競爭？咖喱飯同八方講，選舉係自由嘅，如果阿富上場，競爭一定好熱烈，佢話最重要做好基本功，尤其要履行選舉承諾，仲特別提到，新東泛民支持者喺歷屆立法會都好識配票喎。
李八方
mailto:[email protected]