在任政務司司長時身兼西九管理局董事局主席嘅唐英年，就算退下火線，都同西九管理局中人有聯絡，呢啲人緣唔係人人都有。好似前晚西九管理局喺Pacific Club搞Party，歡送下月初離任嘅行政總裁連納智，都有邀請埋唐唐同唐太出席，齊齊摸住酒杯底同連納智Say Goodbye，西九董事局副主席夏佳理都有到場。八方睇見唐唐塊面紅卜卜，相信佢當晚一定同西九舊同事盡興而歸。
林鄭去星洲講言論自由
點解唔見現任西九管理局主席、即係政務司司長林鄭月娥？皆因林鄭身在新加坡訪問，佢噚日出席當地一個活動致辭時，指「自由」係一個孕育創意思維嘅重要元素、香港嘅言論自由亦係形成香港文化嘅要素，仲提到西九文化區嘅項目，陸續喺明年至2018年落成。訪問新加坡講言論自由，林鄭真係唔怕崩口人忌崩口碗，返到香港，林鄭又係咪咁講呢？