誰說富二代靠家人眷顧是必然的？大家樂太子女陳浩寧（Candice）便是一個好例子，12歲已定下人生目標的Candice，大學畢業後獨自於紐約打工，兩年後回港開創室內設計公司，由one man band到現時10多名員工，她的人生總是無往而不利，卻沒有靠父親一分毫，近年她再拓展家具市場，孖丈夫在設計行內大展拳腳，在家中做個稱職的好媽媽、好太太，事業上也努力衝刺，做足一百分！
撰文：羅慧敏
大家樂太子女陳浩寧（Candice）是ball場新貴，生於一個溫暖的家，父親是大家樂集團主席陳裕光，胞兄是麵包連鎖店「烘焙達人180」老闆陳浩弘，剛滿30歲的Candice依然靠自己雙手創立室內設計公司J. Candice，前年跟丈夫趙益坤（Leonard）誕下一子，Candice貴為太子女，謙卑、肯捱、肯學又隨和的性格，事業、家庭無往而不利。
父親是集團主席，仔女卻沒有接掌父親的生意，各自創業，問Candice有沒有繼承父業的壓力？Candice說：「冇，由細到大都冇講過，所以冇諗過有呢樣嘢，一早諗咗呢條路行（做室內設計）。最初啲人話太子女，我唔係好了解呢個字，都有啲壓力，但係我身邊嘅名人都好落力去做嘢，想法都轉變咗。」
最愛設計與藝術
於美國Syracuse大學主修室內設計的Candice，從小已定下目標，她說：「衫、住宅、室內設計，藝術方面我好有興趣，去到中一、中二就決定想做室內設計，可能因為爸爸都係做餐飲，星期日嘅活動就係去地盤睇，爹哋會叫我睇吓有啲乜可以做，嗰時已經好有興趣，一切都好大自由度畀我去諗，去到中三選科、讀啲乜、去邊度讀書，自己都定下目標，30歲前開到公司，一步一步實現。」開創自家設計公司後，近年與丈夫Leonard拓展市場：「家具由老公負責，畫咗畀廠去做，橫掂都係畀廠去做，不如自己有埋自己品牌，到時可能有10個collection，客人睇到鍾意就可以做。」
紐約打工攞經驗
其實Candice大學畢業後於紐約一間中型設計公司打工，幾乎每事也要一腳踢，令她獲得不少啟發，2009年回港後，她便跟胞兄一鼓作氣共同租下寫字樓，齊齊創業，可讚的是她從沒想過靠父親金錢上的幫助：「呢行好嘅係只需要靠一部電腦，一啲software，靠自己個腦就得，唔需要靠太多資源，爹哋好開心。開始時係喺屋企間房，one man band咁去做，朝早做到夜晚三、四點，第二朝就去見客，維持咗半年，09年開始自己嘅公司。」
【「永遠快人一步」畢生受惠】
家庭，在Candice心目中排於首位：「屋企當然係第一，就算我父母，仔女都係佢哋第一位，我哋都感受到。」Candice與父母相處融洽：「有啲乜都喺飯枱傾，爸爸講生意多啲，管人哲學，一路做生意就知道係乜嘢原因，有一句我好記得，『人冇我有，人有我憂，人憂我變。』喺設計上幫助好大，永遠呢個諗法，節奏快人一步，媽咪就多啲待人接物、處事，教我哋做人謙厚啲。」
對於兒子的未來，Candice目前也努力栽培：「每個人都唔同，我先生就未必知道自己鍾意嗰啲乜嘢，因為佢有太多興趣，大學讀德文又讀心理學，係另外一個方法搵出自己條路。我希望可以畀到小小指導小朋友，某啲興趣特別叻嘅，我會栽培佢多少少嗰方面。」而她更希望生夠四個，組織一個大家庭。
