【果子影評】《巨揪舞壯士》你唔好口水多過浪花啦

【果子影評】《巨揪舞壯士》你唔好口水多過浪花啦

女人睇舞男戲,猶如男人看AV,劇本咩來o架?食唔食得o架?Who cares?你額外附送驚天地泣鬼神,有哲學意味的劇情,是bonus,你公司都唔guarantee你有啦!《巨揪舞壯士》劇本19分,肌肉與舞技101分,拉勻都合格喎。

舞技出色的Channing Tatum開首一段solo,借助電鑽等工具,跳出性意味,編舞充滿力量感。咁早就派糖,齊鼓掌。上集《光豬舞壯士》出盡力搶鏡的Matthew McConaughey離隊,睇頭頓時大減,不過今集以較密集的跳舞場口搭夠,都算有誠意。話說脫衣舞男Magic Mike上集已經走咗去整傢俬,但因姣佬守唔到寡,決定與舊拍檔一起瞓身演出,華麗收山。途中走入美男俱樂部,如入大觀園,俱樂部男有舞技有口技(Rap),燕瘦環肥的餓女,拜倒在結實胸腹巨肌與甜言蜜語下,摸與被摸,皆表現忘我,隔住螢幕都feel到荷爾蒙在翻騰,臨時演員都可以有火的。

女司儀與Channing Tatum的曖昧悶到核爆,口水多到浸死人,真係toooooooooooo much。舞男怕年華老去、不合時宜的blah blah blah,還不如看Joe Manganiello在便利店跳姣舞,搏poker face女一粲那麼引人入勝,襯底音樂還是後街男孩,死未?鋪墊劇情,真係無需要,反正一眾飢渴女入場只想看爆衫與跳舞,你就慳返啖口水,落力跳多兩場啦!Channing Tatum與型女在暗黑沙灘傾偈一段,言之無物,仲要水蛇春咁長,真想剪之而後快!

白面小生Matt Bomer今集表現突出,自戀姣精走去冥想練氣功,大量笑點聚在他身上。歌也意想不到地唱得好,基界男神果然周身刀。最後演出看到各人的冧女手法層出不窮,一個比一個痴線,讓院內觀眾大笑拍手狼叫(沒有誇張)。高潮是Channing Tatum與《So You Think You Can Dance》的tWitch的影子舞,編舞超出色,全院腎上腺素爆燈,差一點就要拿出鈔票擲向銀幕。真不枉聽你多過茶的口水,等到呢一刻!

《巨揪舞壯士》(Magic Mike XXL)
導演:葛列格里雅各斯
演員:卓寧泰坦、麥寶瑪、祖曼堅尼路、奇雲納殊
評分:75分
現已上映

記者:葉青霞