【上環】曾經擔正過TVB套《書劍恩仇錄》做主角紅花會總舵主陳家洛嘅彭文堅，退出娛樂圈之後喺商場長袖善舞發展得唔錯，仲曾經同名模陳祉妤（前名陳沛嘉）結婚，可惜衰偷食搞到離婚收場，近年佢身邊都經常有唔同嘅女性友人出現。
前晚8點幾，身形比起做總舵主時脹咗幾個碼嘅彭文堅，揸住佢架名貴Audi跑車喺上環出現，身旁就載住位長髮低胸裝、貌似李嘉欣年輕女子現身上環，佢喺區內兜咗足足10幾分鐘至搵到路邊咪錶位泊車。當「翻版嘉欣」落車時，穿上短褲嘅佢露出一對修長美腿。之後彭文堅一副大男人模樣全程翻版嘉欣跟在他身後，他們入咗附近間名為Yakiniku Great的日本烤肉店。由於當時店內未有位，兩個人就要喺門口等位，呢個時候人肥大汗嘅彭文堅，已經濕到不顧儀態用紙巾喺背脊吸汗，而身旁嘅翻版嘉欣完全冇介意，仲同佢有講有笑非常熟絡。
為個位嘈足兩分鐘
兩個人喺門口等咗5分鐘後終位等到有位。當侍應生帶佢哋去座位時，翻版嘉欣已經急急腳坐低，不過彭文堅似乎唔滿意個位靠窗太過開揚，見佢好勞氣咁同侍應生爭辯咗足足兩分鐘要求換位，可惜都不得要領，最後惟有死死地氣坐低，
冇幾耐就有兩名男性友人嚟到會合，當侍應生送上幾條毛巾畀各人，等佢哋可以清潔一下雙手嘅時候，彭文堅就老實不客氣，將一條抹手巾幻化成沖涼巾，先猛捽雙手繼而好似洗面咁抹面更兼用來抹鼻，一條毛巾畀佢搓足成分鐘後至捨得放手，又難為身旁位翻版嘉欣好似已經見怪不怪咁在用手機照鏡。成個人舒服晒嘅彭文堅卒之心情靚番，攞住個餐牌同翻版嘉欣點菜，兩人互相交流加埋侍應生講解又足足搞咗幾分鐘至落完order。
採訪、攝影：楊浩賢、畢紹基、徐錦池、梁繼光
【最失敗】彭文堅演陳家洛惹劣評
彭文堅憑參加1987年TVB舉辦的超級新星選舉，勇奪男子組冠軍。之後出道就被金牌監製李添勝賞識，找他演出TVB重頭電視劇《書劍恩仇錄》，飾演男主角紅花會總舵主陳家洛，不過劇集推出後引來觀眾惡評如潮，收視亦未如理想，他更被喻為最失敗的選角。
離開TVB後，彭文堅轉投亞洲電視，一年後便離開退出娛樂圈全面從商，並且跟名模陳祉妤拍拖。其間彭文堅因被指欠債連累女友被收數佬恐嚇報警。2009年彭文堅跟陳祉妤結婚，兩人婚姻維持到2012年離婚，同年出任一上市公司副主席。
