「牛下女車神」李慧詩（Sarah）認真威水，噚日喺北京出戰全國場地單車錦標賽，再次喺凱林賽力壓多名中國勁敵，四日內掃走第三金！師弟梁峻榮都唔執輸，首次奪走全能賽銀牌，為港隊以四金一銀完美埋齋。
禮拜二贏完500米計時賽，前日又喺爭先賽輕鬆奪金，Sarah噚日轉戰壓軸嘅凱林賽，好似有用唔盡嘅體力。佢喺首圈同上海名將鍾天使分別以首、次名晉級，次圈又輕鬆以首名衝線；殺入決賽後，即使面對強敵郭爽，加上受到黑龍江車手林俊紅同韓豔夾擊，但Sarah依然冇有怕，喺最後一圈突圍而出，拋離郭爽同山東嘅劉莉莉奪冠，四日鬥足三項全部奪金。
男隊嚟到壓軸一日都唔輸蝕，主將梁峻榮噚日出戰全能賽，原本排名第二嘅佢雖然喺較弱嘅250米計時賽得第五，但靠最後一項記分賽爭分，追番上第二位，屈居吉林嘅劉浩之後收穫銀牌。連同另一男將張敬樂早前奪得全能賽金牌，港隊今屆以四金一銀完美謝幕，之後留守北京，續戰屬於世界盃外圍賽嘅中國盃。