以前看漫畫，聽過校園有七不思議事件，但原來在上季馬場亦發生過七單不可思議事件，現在讓我跟大家重溫一下。
1.雷神145W封王
莫雷拉上季首度登上冠軍寶座，相信好多人都唔會覺得奇怪，不過能夠破紀錄贏出145W，比起韋達九年前寫下之舊紀錄114W多出31場，喺現今競爭激烈之香港馬圈，咁就肯定好多人諗都無諗過，至於雷神新季可唔可以再「破頂」，就要大家拭目以待了。
2.三駒平頭第四
兩駒跑獲平頭名次時有發生，不過上季7月5日第六場由於「綫路財星」與「權杖神駒」的鼻子被其他馬遮擋，未能以電眼判決誰先觸線，小組裁定牠們與「大家熊」三駒齊齊跑獲平頭第四名。
3.麟轉乾坤一季五捷
上季產生唔少多捷馬，當中最令人意想不到肯定係「麟轉乾坤」，前季出道九戰全負，上季跌至20分起步，竟然來一個大反彈，全季勁取五W五P，可惜佢嘅練馬師孫達志始終未能夠贏15W畢業。
4.飛廉之子1.2倍冇影
成日話任何投資都有風險，切勿孤注一擲，「飛廉之子」算係最好教材，初出大超班姿態贏馬，翌仗熱捧至1.2倍卻因氣管有痰倒灶，是千禧年以來首匹熱至1.2倍連P都冇之馬匹。
5.韋達守齋六日
韋達貴為13屆冠軍，不過近兩季風頭已被潘頓及莫雷拉趕過，剛季尾更寫下連續六戰食白果之個人「悲痛」紀錄，莫非英雄真係「不許人間見白頭」。
6.金巴裡好爆245倍W
上季最意想不到頭馬必定要數「金巴裡好」，此駒只曾在泥地短途上名，5月24日初跑田草1600米，仲要排14檔，臨場冷至245倍竟然一放到底，搞到成個馬場都係眼鏡碎。
7. 3.25改寫三項泥地紀錄
泥地現時共有三項路程，分別為1200、1650及1800米，上季3月25日全泥宴，竟然一晚刷新三項路程之紀錄時間，分別由「嫡愛」、「準備就緒」及「兵工闖」，簡直可以話係大奇蹟日。