德國女總理默克爾夫人對付希臘總理齊普拉斯，幾似阿媽教仔。齊普拉斯上台後，憑國內民意支持，要求歐盟削債，撤銷不少財政緊縮措施，唔想出售國有資產。但默克爾堅決拒絕，齊普拉斯搵埋「慈祥世伯」法國總統奧朗德去講好話，求情，「阿媽」不為所動，「阿仔」索性撒野，返希臘搞公投，61%國民講No，以為德國阿媽點都會受到壓力；哈，默克爾更加板起塊面，開出更辣條件，用雞毛掃打到齊普拉斯跪低認錯，好似死狗咁接納歐盟救援方案，返希臘哭求國會支持。
好咯，正規手續辦完，德國國會通過埋方案，希臘銀行可以重開，默克爾就對傳媒講：「如果希臘肯守規矩，進行經濟改革，有理財規律，我地可以考慮一啲削債條件嘅！」態度就好似阿媽鬧完、打完唔聽話嘅頑皮仔後，就講番幾句：「阿仔聽話，唔再頑皮嘅話，阿媽會俾番啲零用錢你！」
希臘上演悲劇還是鬧劇，還未可知。三藩市老友投資K在網上搜尋到不同資料，化繁為簡，用通俗語言講解希臘債務問題，傳來俾左丁山睇吓，大家笑餐飽，至於是否投資K原作／改編，還是網上流傳文字，不須深究，左丁山試繙譯如下：
夏天渡假季節，希臘一個外島小村落了無生氣，遊客罕至，村內人人欠債，靠信貸渡日，不知前景。某個周末，突有一位德國賓架揸車嚟到，停在村酒店外，落車走入去，話要租一間靚房渡周末，東主話房就有，但唔接受信用咭，要現金。賓架放低一張一百歐元，即攞幾條鎖匙上樓揀房。店主見機不可失，執住張一百歐元鈔票，狂奔到街尾嘅肉食舖（供應商）找數，肉食商攞住一百歐元，跑去農場向豬農還錢，豬農大喜，拎住張一百蚊紙去附近一間酒館清還過往積累嘅一筆飲酒賬單，酒館主人見有錢收，向酒館內一名飲緊酒嘅吧女講：「嗱，同你上床咁耐，未俾過錢，依家明益你，唔好話我攞你便宜食免費餐！」吧女攞到錢，就奔跑往村內小酒店，清還平時「做生意」嘅時鐘房租。酒店東主攞番張一百元歐元，放在枱上。呢個時候德國賓架從樓上走番落嚟，話冇一間房鍾意，鬧幾句希臘酒店冇水平，拎番張一百蚊紙，揸車走了！經一番走動，條村嘅GDP冇增加到，冇人有現錢落袋，但村內各人都清還了欠債，感覺良好，非常開心，深信明天會更好。這就是歐盟、歐央行、IMF救援希臘計劃的要義！