家計會早排出咗個新廣告，叫人及早計劃生多幾個小朋友，「一個可以獨奏，兩個可以孖住上，鍾意熱鬧不妨4人大合唱，甚至，湊夠數參加籃球賽」，辣㷫唔少網民，有人鬧爆家計會離地，唔知好多人唔係唔想生，而係樓價高、工時長、政治前景暗淡等因素下唔敢生！
家計會噚日出聲明話大家誤會晒，話個廣告只係用咗誇張手法，提醒想生小朋友嘅人早啲計劃，唔係鼓勵生多幾個，亦無意叫唔打算生小朋友嘅人改變決定喎。家計會仲列埋幾個表出嚟，證明近年已經多咗人想生小朋友，只係同時婦女生育年齡越推越遲，先提醒大家及早計劃。
八方睇真啲個廣告，又真係冇叫大家生5個嘅，但卻另有大發現，湊夠數組籃球隊嗰個畫面，飾演媽咪嘅演員亮相嗰吓，原來仲陀緊一胎㗎！一胎可以係一個，可以係三個……嗯，打籃球都要後備嘅……