A股市場終於穩定落嚟，回顧今次阿爺救市招數之中，最令人驚嘆嘅莫過於出動公安緝拿惡意沽空嘅人，何謂惡意？有無善意？惡意可能要坐監，善意可有獎？到目前大家都仲係估估吓。
相對於善意有無獎，外資更擔心嘅係何謂惡意，如果從香港（法治完全獨立嘅地方）證券市場而言，沽空係中性嘅，只分合法同非法。如果以本報早前報道，惡意沽空，內地可能會構成操縱證券、期貨市場罪，香港都有相關法例，證監可以透過民事及刑事雙軌制打擊市場失當行為。
兩者分別在於司法制度，外資一向較傾向於本港成立地區總部，主要係睇中香港司法制度，唔似大陸黨最大，阿爺話係就係。外資覺得拎返香港打官司又或者仲裁會安心啲，要知道，做生意嘅嘢，糾紛通常同錢有關，係民事case，佢今次惡意沽空係講緊刑事case，要坐監。今個星期初彭博報道，官方查緊操縱市場公司包括上海自貿區嘅貿易公司，雖然上海市政府即刻好緊張咁澄清話無咁嘅事，但今次如果真係捉咗啲外資的話，外資再考慮進入中國市場時一定會多層考慮同憂慮。
流氓