曾誠同湯馬士梅拿真係好大仇口，一晚救出佢三球，協助廣州恒大淘寶（FC廣州）噚晚喺天河體育場於互射12碼以5:4擊敗下半場撳掣出強陣嘅拜仁慕尼黑，兼且令到拜仁唔能夠用勝利嚟結束今次中國之旅。
互射12碼4:5負恒大
拜仁對上兩場對華倫西亞同國際米蘭都強陣，但噚晚對恒大，唔知係教練哥迪奧拿係想畀機會啲新人，定係覺得恒大太弱，正選名單上唔見咗拿姆、沙比阿朗素同湯馬士梅拿，其中喺中前場六個球員之中竟然有四個係球迷頗陌生，分別係賀積查治、甘美治、施巴斯坦洛迪同埋施蘭卻特，好彩後防都見得吓人，紐亞、謝路美保定同阿拉巴都喺度，如果唔係肯定俾球迷鬧爆。相反恒大就認真得多，鄭智、荷西保連奴、郜林同啱啱加盟嘅羅賓奴都正選登場；其中郜林踢埋呢場友賽就可以小休，皆因佢唔尊重球迷而俾中國足協罰停賽五場。所以恒大亦勁升溫，主W由20倍落到得番12倍。
拜仁今場俾咗唔少機會恒大，郜林就有兩次半單刀，可惜射唔破紐亞。哥迪奧拿見勢色唔對，下半場換入拿姆、堤亞高艾簡達拿、杜格拉斯哥斯達、湯馬士梅拿同埋沙比阿朗素，但始終入唔到波，而且差啲輸埋，好彩郜林單刀失機。完場前恒大龍門曾誠第二次救出梅拿必入波，法定90分鐘踢成0:0。互射12碼兩隊球員淨係得梅拿宴客俾曾誠救出，恒大最終贏5:4，報番喺2013年世冠盃輸0:3之仇。
維達爾即將成「仁」
喺鬥恒大前，拜仁宣佈喺祖雲達斯簽入智利中場維達爾，轉會費據報係3,600萬歐元；只要維達爾之後通過埋個體測，呢單交易就會落實。