由消費者委員會、記協同埋攝記協合辦嘅「消費權益新聞報導獎」，噚日舉行第15屆頒獎，喺224份參賽作品中，頒發合共8個組別，金、銀、銅共26個獎項，以及4個優異獎。
當中《蘋果》攝記同事易仰民（圖），就以〈DR針害者截雙腿失四指活下來 控訴不法商人逍遙法外〉一相，奪得新聞攝影組別銀獎，《壹週刊》記者莫志樑同陳凱敏，亦分別憑〈毀有效日期充新貨 莎莎賤招呃客〉同〈本刊化驗鉛超標20倍 高仿韓國化妝品熱賣〉兩篇報道，分別獲得新聞組別同特寫組別銀獎。
噚日唔少到場行家，因為事前收到風，話被傳在炒魷名單之上嘅商務及經濟發展局局長蘇錦樑會去頒獎，但最終只見該局常任秘書長容偉雄現身，主辦單位話最初係邀請蘇錦樑出席，但佢唔喺香港而換人負責頒獎。