【本報訊】暗示胞弟曾德成被特首梁振英逼走的立法會主席曾鈺成，昨指若自己年輕10年，定必對某些人的做法「忍唔住道氣」，會參選特首「睇吓你點整我」，同時又在報章撰文指：「能力高超的人不一定得人喜愛。」有泛民議員認為曾鈺成的矛頭明顯指向梁振英，顯然不屑梁「陰濕整人」而出言警誡。
記者：呂浩然
向來傳與梁振英不咬弦的曾鈺成，一向被認定是2017年特首選舉黑馬，或對爭取連任的梁振英構成威脅。曾鈺成昨接受港台訪問談及政途時，除表明不會爭取連任立法會議員，亦重申不會參選特首，但他意有所指稱：「如果我後生10年，我就真係會忍唔住道氣……𠵱家有啲人，有啲做法，（令我）有時我會諗如果我後生10年，我就會（諗）：『豈有此理（說時用手拍自己大髀）！我就出嚟參選，睇你點樣整我！』」
曾進一步解釋，有時某些人的言論令他覺得：「（有些人）仲係擔心曾鈺成條友會走出嚟搞局，『我就要整死你』咁。所以如果我後生啲，我就會沉不住氣，話：『你想整死我，就唔畀你整死；你想唔畀我選，我就要選畀你睇吓』」，但他強調已經過了這個階段，現時已「不為所動」。
「目中無人令人反感」
2012年特首選舉期間，唐英年被爆出僭建醜聞而有墮馬危機後，曾鈺成一度稱考慮去馬，其後自爆當時為候選人的梁振英曾主動致電他，表明不會搞其黑材料。
而在電台開腔之餘，曾昨亦在報章專欄撰文指，「能力高超的人不一定得人喜愛」，相反很多時有傑出表現和成就的人，「或因恃才傲物、跋扈囂張，或因放蕩不羈、目中無人，令和他交往的人難受、反感」；又指「如果這樣的人當了一個團隊的領袖，而團隊裏又無人可以補救他的缺陷，這個團隊便不可能維持良好的士氣，不可能發揮團隊裏每個成員的積極性」。曾鈺成更認為，只有IQ（Intelligence Quotient）、EQ（Emotional Quotient）和CQ（Creation Quotient）俱備的領袖，才會得到人們的佩服、喜愛和信任。
泛民認定言論劍指梁
適逢梁振英剛辭退曾德成，泛民認定曾連番言論劍指梁。公民黨陳家洛指，曾的說法有意警誡梁，指曾鈺成自爆梁致電他、內容涉其黑材料；加上其弟曾德成因不聽話而「被退休」，相信深明建制陣營權鬥的曾鈺成，對梁振英及梁粉「水鬼升城隍」、「（對他們）陰濕整人嘅做法好不屑」。
工聯會黃國健則指曾鈺成是否針對梁振英，「大家聽到意會係乜，咁就各有意會」，但他覺得「針唔拮到肉唔知痛」，「可能今次針拮到（曾鈺成的）肉，所以特別痛，就講呢啲話」，相信曾所說的只是意氣說話。
曾鈺成亦提及，政改表決甩轆事件造成建制派之間的裂痕仍未修復，「（但）裂痕還裂痕，𠵱家冇人宣告脫離建制派，冇人去表示要絕交」，相信建制派「都要繼續維持大家嗰個合作」。
識睇睇留言
Anders Kwok：未死都要爭氣，去馬
Michael Wong：為了自身利益內訌地下黨員情都無得講。共產黨不是團結的嗎？
Forest Rain：曾先生不要扮好人，如真的為香港好，放黑材料給傳媒踢爆689真面目，比在鏡頭前說風涼話更有效！
Lo Lee：惟有希望鬍鬚曾出來選特首，踢689落台。
Stephen Tsang：睇下點樣整佢？講得咁迂迴，係咪指緊689？
南征北戰：整你「細佬」同整你有何分別？而另一個只是被「陪整」，快啲還拖！好想睇！
Andy Liu：好，雖然唔係好認同你。只不過同689反面，點都多啲人撐你嘅！
Johnly Page：「如何整治自己」？唐英年就係扭扭擰擰，之後被人整治囉！你以為，表明唔玩，佢就放過你？
資料來源：《蘋果》網頁