美國周三喺金盃同牙買加爭入決賽，大家都以為佢哋贏梗，點知俾對手兩個美職聯球員麥托斯同基里斯班尼斯射破大門，爆大冷輸1:2，自2003年後首次入唔到金盃決賽。佢哋教練奇連士文賽後表示：「我哋好失望。呢場波我哋有四、五個入波機會，但都把握唔到，結果就輸咗。恭喜牙買加入決賽。」牙買加就歷嚟首次入金盃決賽。
牙買加決賽鬥墨西哥
牙買加喺下周日決賽嘅對手係六屆盟主墨西哥，墨西哥喺補時10分鐘由古亞達度入12碼逼和巴拿馬1:1，之後喺加時由古亞達度入多一球12碼，戲劇性反勝2:1入決賽；巴拿馬雖然入唔到決賽，但就做咗個驚人數據，就係連續五場金盃都開1:1波膽，真係蠱惑到暈。